Pitmaster
May 31, 20202 min
الاهتمام بالتفاصيل الصغيرة هينقل البرجر بتاعك من "كويس بس" ل "جامد جدا"
حتي لو قررت متعملش كل الخطوات اللي جاية دي.. أي خطوة منهم هتنقلك لقدام شوية، فحاول تعمل علي قد ما تقدر.
عشان تعمل برجر مظبوط، لازم يكون لين، طري أو "جوسي".
وعشان توصل لدة، لازم تبدأ باللحمة الصح، اللحمة لازم تكون فيها نسبة دهون لا تقل عن ١٨٪ ل ٢٢٪ وإلا البرجر هيتحرق وهيفقد السوايل أثناء التسوية وينشف.
صدقني، السر كلة في اللحمة، ولو لم آكل برجرا لوددت أن آكل برجرا.
في مدرسة مهمة كمان بتقول ان اللحمة تكون ٧٥٪ بقري و ٢٥٪ ضاني، ودة بياخد البرجر لمستوي تاني خالص...
اللحمة لامفرومة لازم تكون طازة "فريش".
يعني لو قدرت تخاي الجزار يعملهالك في نفس اليوم اللي هتاكلها، يبقي عظيم.
ولو عايز تعمل الصح، تفرم اللحمة بنفسك في البيت لو عندك مفرمة أو Food Processor
إشتري اللحمة، وحطها في الفريزر لمدة ١٥ دقيقة وقطعها صغير قبل الفرم... وممكن تفرم مرتين عشان توصل للمقاس اللي انت عايزة.
افتكر كويس إن اللحمة مش زي العجينة.. يعني كل ما تشتغل بعنف مع اللحم، هتنشف...
إنت محتاج تحطها في طبق غويط، وتفتحها عن بعضها بالراحة وتزود الملح والفلفل والتوابل اللي بتحبها وتخلطهم بالراحة.
شوية رطوبة علي إيدك قبل تشكيل البرجر هتمنع البرجر من الالتصاق بايدك وهتخلية يمسك في بعضة وياخد الشكل المظبوط وميتكسرش علي الشواية.
قسم اللحمة المفرومة لأجزاء متساوية وابدأ بتشكيل البرجر بشكل دائري بحيث يكون سمك الأطراف حوالي ٢.٥ سم والمركز حوالي ٢ سم بس...
البرجر بيكش أو بيلم علي بعضة أثناء التسوية وعشان كدة الجزء اللي في النص هيملا والبرجر هيكون متساوي وشكلة حلو بعد التسوية
عادة بنصح ان الستيك يطلع من التلاجة ويوصل لدرجة حرارة الغرفة قبل التسوية، لكن في حالة الرجر، الوضع مختلف. البرجر لازم يطلع من التلاجة علي الشواية علي طول عشان يفضل ماسك نفسة ومحتفظ بشكلة الدائري الشهي.
شبكة الشواية من ضمن العوامل المؤثرة بشكل كبير في جودة البرجر...
الشبكة لوعليها بواقي من اللحوم اللي شويتها قبل كدة، البرجر هيلزق ويتكسر عليها...
بعد تسخين الشبكة امسحها بزيت عشان البرجر ميلزقش فيها ويتقلب معاك بسهولة...
ولع الفحم كويس، إضغط هنا لمعرفة طرق إشعال الفحم، وخلي الشبكة تسخن كويس جدا.. مفيش داعي للاستعجال... لو الشبكة سخنة مش هتقدر تحط إيدك علي قرب ٣ سم لمدة ثانيتين...
لو الشواية بتاعتك ليها غطا، يكون أفضل عشان توصل لدرجة تسوية متساوية من جميع الاتجاهات...
تقليب البرجر اكتر من مرة وبسرعة هيخلي البرجر يفقد السوايل وينشف...
لو بتحب البرجر ميديوم، هياخد ٤ دقايق وبياخد ٥ دقايق عشان يبقي ويل دان...
قلبي بيتقطع لما بشوف حد بيضغط علي البرجر...
بشكل عام، أنا ضد الضغط علي اللحوم أثناء التسوية، انت كدة بتطرد كل السوايل والطعم البيفي خارج البرجر وبتنزلة علي الفحم، الفحم بيولع أكتر ويحرقلك البرجر، يعني الضربة القاضية يا عزيزي والبقية في حياتك في الساندويتش اللي كنت بتحلم بية...
زي كل اللحوم، البرجر بيحتاج يرتاح دقايق بعد التسوية عشان يجمع السوايل تاني ويبقي "جوسي"
حضرتك كدة جاهز تحط الحاجات اللي بتحبها علي الساندويتش، جبنة، كاتشب، مايونيز، ماسترد، مربة...
يا ريت لو تشارك الصور معانا علي الفيسبوك
ومتنساش تتابعنا علي انستجرام