أهم ١٠ خطوات لعمل البرجر علي الشواية

الاهتمام بالتفاصيل الصغيرة هينقل البرجر بتاعك من "كويس بس" ل "جامد جدا"

حتي لو قررت متعملش كل الخطوات اللي جاية دي.. أي خطوة منهم هتنقلك لقدام شوية، فحاول تعمل علي قد ما تقدر.

١. البرجر الصح يلزمة لحمة الصح

عشان تعمل برجر مظبوط، لازم يكون لين، طري أو "جوسي".

وعشان توصل لدة، لازم تبدأ باللحمة الصح، اللحمة لازم تكون فيها نسبة دهون لا تقل عن ١٨٪ ل ٢٢٪ وإلا البرجر هيتحرق وهيفقد السوايل أثناء التسوية وينشف.

صدقني، السر كلة في اللحمة، ولو لم آكل برجرا لوددت أن آكل برجرا.


في مدرسة مهمة كمان بتقول ان اللحمة تكون ٧٥٪ بقري و ٢٥٪ ضاني، ودة بياخد البرجر لمستوي تاني خالص...

اللحمة لامفرومة لازم تكون طازة "فريش".

يعني لو قدرت تخاي الجزار يعملهالك في نفس اليوم اللي هتاكلها، يبقي عظيم.

ولو عايز تعمل الصح، تفرم اللحمة بنفسك في البيت لو عندك مفرمة أو Food Processor

إشتري اللحمة، وحطها في الفريزر لمدة ١٥ دقيقة وقطعها صغير قبل الفرم... وممكن تفرم مرتين عشان توصل للمقاس اللي انت عايزة.

٢. اللحمة مش عجينة ومحتاجة معاملة خاصة

افتكر كويس إن اللحمة مش زي العجينة.. يعني كل ما تشتغل بعنف مع اللحم، هتنشف...


إنت محتاج تحطها في طبق غويط، وتفتحها عن بعضها بالراحة وتزود الملح والفلفل والتوابل اللي بتحبها وتخلطهم بالراحة.

٣. حط إيدك تحت المياة قبل تشكيل البرجر

شوية رطوبة علي إيدك قبل تشكيل البرجر هتمنع البرجر من الالتصاق بايدك وهتخلية يمسك في بعضة وياخد الشكل المظبوط وميتكسرش علي الشواية.

٤. اعمل حفرة صغيرة في نص البرجر

قسم اللحمة المفرومة لأجزاء متساوية وابدأ بتشكيل البرجر بشكل دائري بحيث يكون سمك الأطراف حوالي ٢.٥ سم والمركز حوالي ٢ سم بس...


البرجر بيكش أو بيلم علي بعضة أثناء التسوية وعشان كدة الجزء اللي في النص هيملا والبرجر هيكون متساوي وشكلة حلو بعد التسوية

٥. خلي البرجر في التلاجة لحد معاد التسوية

عادة بنصح ان الستيك يطلع من التلاجة ويوصل لدرجة حرارة الغرفة قبل التسوية، لكن في حالة الرجر، الوضع مختلف. البرجر لازم يطلع من التلاجة علي الشواية علي طول عشان يفضل ماسك نفسة ومحتفظ بشكلة الدائري الشهي.

٦. ابدأ بشبكة شواية نضيفة وجاهزة

شبكة الشواية من ضمن العوامل المؤثرة بشكل كبير في جودة البرجر...


الشبكة لوعليها بواقي من اللحوم اللي شويتها قبل كدة، البرجر هيلزق ويتكسر عليها...

بعد تسخين الشبكة امسحها بزيت عشان البرجر ميلزقش فيها ويتقلب معاك بسهولة...

٧. الشبكة لازم تكون سخنة جدا

ولع الفحم كويس، إضغط هنا لمعرفة طرق إشعال الفحم، وخلي الشبكة تسخن كويس جدا.. مفيش داعي للاستعجال... لو الشبكة سخنة مش هتقدر تحط إيدك علي قرب ٣ سم لمدة ثانيتين...

لو الشواية بتاعتك ليها غطا، يكون أفضل عشان توصل لدرجة تسوية متساوية من جميع الاتجاهات...

٨. البرجر بيتقلب مرة واحدة بس

تقليب البرجر اكتر من مرة وبسرعة هيخلي البرجر يفقد السوايل وينشف...

لو بتحب البرجر ميديوم، هياخد ٤ دقايق وبياخد ٥ دقايق عشان يبقي ويل دان...

٩. متضغطش علي البرجر

قلبي بيتقطع لما بشوف حد بيضغط علي البرجر...


بشكل عام، أنا ضد الضغط علي اللحوم أثناء التسوية، انت كدة بتطرد كل السوايل والطعم البيفي خارج البرجر وبتنزلة علي الفحم، الفحم بيولع أكتر ويحرقلك البرجر، يعني الضربة القاضية يا عزيزي والبقية في حياتك في الساندويتش اللي كنت بتحلم بية...

١٠. سيب البرجر يريح بعد ماتشيلة من علي الشواية

زي كل اللحوم، البرجر بيحتاج يرتاح دقايق بعد التسوية عشان يجمع السوايل تاني ويبقي "جوسي"

شوف الفيديو

حضرتك كدة جاهز تحط الحاجات اللي بتحبها علي الساندويتش، جبنة، كاتشب، مايونيز، ماسترد، مربة...

يا ريت لو تشارك الصور معانا علي الفيسبوك

www.facebook/charbullbbq

ومتنساش تتابعنا علي انستجرام

www.instagram.com/charbullbbq


536 views0 comments