top of page

إزاي تعمل بريسكت مدخن في ٥ خطوات

تسوية البريسكت علي شواية الفحم مش سهل ابدا وبياخد وقت طويل قد يصل ل١٦ ساعة واحيانا اكتر.

البريسكت لو استوت صح هتدوب في بقك ولو استوي غلط هيتحول لحتة كاوتش متتاكلش.

في السطور الجاية هتشوف ازاي ممكن تعمل احلي بريسكت مدخن علي الشواية في ٥/ خطوات.

بما اني متخصص في الباربيكيو وعاشق للأكل من علي الشواية، فالبريسكيت كانت من الحاجات اللي عملتها كتير، فشلت أحيانا ونجحت أحيانا، وبعد التجارب دي لقيت ان الخطوات الجاية دي هي اللي هتوصل بيها للطعم المظبوط والليونة المطلوبة.


اختيار اللحم

لو عايز تاكل بريسكت "تكساس ستايل"، لين وبيدوب في بقك، لازم تبدأ من اختيار اللحمة، لحمة عالية الجودة ويا سلام لو "انجس" رخامي.

البريسكت من اكبر القطعيات اللي ممكن تلاقيها عند الجزار وفيها اهم عضلتين، العضلة المسطحة تاخد منها الشرايح والعضلة المدببة تاخد منها دهون محروقة ومقرمشة. طعمها خطير!

البريسكت بتيجي من عضلة الصدر للبقر، في المنطقة الأمامية وتحديدا قدام الارجل الامامية.

الانسجة اللي بتربط العضلة دي مع بعض ناشفة شوية وعشان كدة تسويتها لازم تبقي علي نار هادية وبطيئة والدهون الرخامية هي اللي هتوصلك للطعم المطلوب.

التحضير والتجهيز

الخطوة الأولي بلا شك بتحصل في المزرعة او المرعي عي طريق التربية والاكل والمزيكا والتدليك والتهجين وغيرة، لكن الخطوة التانية بتحصل عندك انت. بعد اختيارك للحمة كويسة، لازم تبدأ بتنضيف اللحمة من الدهون الصلبة القريبة من العضلة المدببة. عشان تضمن وصول التتبيلة لكل طبقات اللحم لازم طبقة الدهون متزيدش عن ٠.٥ سنتيمتر.

ابدا بوضع التتبيلة علي اللحم قبل التسوية بليلة، الملح اللي في التتبيلة هيخترق الطبقات ويبدأ بسحب الرطوبة اللي في اللحمة ودة مهم جدا في التسوية وليونة اللحمة عند الأكل.


في أنواع كتير للتبيلات الجاهزة و بصراحة في جزء كبير من المتعة في تجربة أنواع مختلفة كل مرة، ودة هيديك طعم مختلف كل مرة. في مدرسة كاملة بتستخدم فقط ملح وفلفل وفي مدرسة بتضيف حاجات تانية للخلطة.

معلقتين ملح خشن

معلقتين فلفل اسود

معلقة بودرة توم

معلقة ملح متبل

معلقتين سكر بني

اخلط الحاجات دي كويس جدا، ادهن البريسكت زيت زيتون من جميع الاتجاهات وبعدين حط الخلطة بتاعتك علي كل حتة في البريسكت ودخلها التلاجة تقضي ليلة سعيدة يا عزيزي.

شغل شوايتك وابدا في التسوية

الخلطة اكيد تخللت اللحم وبدأت تخلق اللون المطلوب وتضفي طعم لذيذ في اللحمة، في المرحلة دي هنبدأ عملية التدخين/التسوية علي نار هادية.

وعشان تضمن ليونة اكتر، انصحك بوضع طبق فويل/الومنيوم مليان مياة داخل الشواية. البخار ده هو السر كلة!

بعد ٤ ل ٨ ساعات من التدخين، حسب حجم اللحمة وسخونة شوايتك، هتبدأ تشوف اللون البني المحروق ده علي اللحمة. الوش المملح المقرمش ده هو علامة الليونة والطعامه والجمال كله.


اللون ده معناة ان البريسكت من جوة وصلت لدرجة حرارة ١٦٠ ل ١٧٥ فهرنهايت تقريبا.

في المرحله دي، لازم تبدأ تلف البريسكت في الومنيوم او ورق زبدة/بوتشر بيبر لحد ما تكتمل التسوية عشان تحافظ علي اللون والليونة اكتر واكتر.

انتظر اللحظة السحرية

انا مش عايز اصدمك واقولك ان بعد كل اللي انت عملتة ده، ممكن برضو تنتهي ببريسكت ناشف او طعمه مش حلو. كلنا وقعنا في غلطات في النص ممكن تبوظ كل حاجة. وعشان كدة المرحلة الأخيرة دي مهمة جدا! الفينالي يا صديقي!




ريح البريسكت

البريسكت زي أي ستيك، لازم يستريح بعد التسوية عشان يجمع العصارة والطعم ويديك افضل نتيجة.. لازم تلف البريسكت في فوطة او اتنين وتحطة في كولر بوكس، من غير تلج طبعا، عشان يفضل محافظ علي درجة حرارتة... اقل حاجة لازم تكون ساعة، ولو قدرت تلات ساعات يبقي تمام.

دلوقتي جرب وابعتلي صورك وتجربتك واسئلتك




3,666 views1 comment
bottom of page