أفضل ٧ قطعيات لحوم للشواية
Updated: May 31, 2020
في شوية حاجات مهمة جدا عشان تاكل ستيك جامد ومختلف زي اللي بتاكلة في المطاعم الكبيرة.
الطعم المدخن، ليونة اللحمة واحتفاظها بأكبر كم من العصارة وانة يكون مقرمش ومحرمش من برة.
ابتديت تتخيل؟ حسيت بالطعم بيتخلل جهازك العصبي وانتابتك القشعريرة؟
الحقيقة لو نجحت انك تعمل دة في البيت فالموضوع يستاهل حفلة صغيرة كدة قدام مسلسلك المفضل علي نيتفليكس في ليلة مقمرة في نص الأسبوع وتاكل احلي ستيك في الدنيا.
قبل تجهيز الشواية، لازم تختار قطعة لحمة جيدة. في السطور الجاية هوريك أجمد قطعيات اللحمة اللي ممكن تاخد منها نتيجة كويسة جدا علي الشواية.
١. لحم الريب آي
لحم الريب آي أو "الريش" أو "الضلوع" هو غالبا أفضل قطعيات اللحوم للشواية، عشان فيها توازن كويس جدا بين الدهون والليونة وطعم اللحم "الطعم البيفي"
سواء هتشويها بالعضم أو من غير العضم، هيفضل الريب آي هو "كينج" الشواية.
بعض المطاعم بتسمية ريب آي والبعض بيسمية ريب ستيك، الاتنين نفس الشئ
لازم يستوي علي نار متوسطة-عالية لحد ما توصل لدرجة التسوية المفضلة ليك..
٢. لحم الستريب
وأحيانا بيسموة نيويورك ستريب أو كانساس ستريب أو ستريب لوين أو توب لوين.
الستريب ستيك قطعية قوية ومحببة عند ناس كتير جدا. بتحس فيها بطعم اللحم (البيفي) يمكن أكتر من الريب آي ولكن قد يكون علي حساب الليونة ودة بسبب قلة الدهون في القطعة دي، وطبعا في عوامل كتير بتتحكم في جودة الستريب ستيك زي المرعي، العمر، التجهيز وغيرة.
أحيانا بتكون موجودة بالعضم لكن مش كتير وبيسموها كلوب ستريب.
٣. لحم التندر لوين
من أحلي وأغلي وأطري قطع اللحم اللي ممكن تاكلها.
عضلة طويلة علي شكل القلم الرصاص، موجودة تحت الشورت لوين بعيدة عن أي مجهود وعشان كدة بتحتفظ بالليونة بتاعتها بشكل كبير.
أهم حاجة في التندرلوين هي الإهتمتم بدرجة التسوية عشان تفضل طرية أو "جوسي"
٤. بورت هاوس ستيك
البورت هاوس ستيك بييجي من الجزء الأعلى في الفخد وبيكون في جزء من عضمة الضهر مع بعض من العضلات علي أحد الجوانب وقطعة من التندر لوين علي الجانب الآخر.
عادة البورت هاوس بيبقي غلي شويتين في مطاعم الستيك الكبيرة وعشان كدة لو عملتة في البيت هتوفر كتير.
٥. تي بون ستيك
التي بون هي اشبة ما يكون بالبورت هاوس ستيك ولكنها مقطوعة من الجزء الأمامي من الشورت لوين أو بيت الكلاوي وعشان كدة بتكون من غير عضلات التندر لوين.
٦. سكيرت ستيك
السكيرت مش بتيجي من بيت الكلاوي، القطعية دي مختلفة وبتيجي من البيف بليت او من الجزء الأوسط في البطن.
السكيرت مليان بالطعم البيفي وبالذات لو سويتة علي نار عالية ولوقت قصير عشان يحتفظ بالسوائل والليونة اللي بيمتاز بيها. عشاء مميز وشهي يا عزيزي.
ممكن تقطعة صغير وتجربة مع التاكوز
٧. توب سيرلوين ستيك
التوب سيرلوين هو نقطة التلاقي بين السعر والطعم والليونة. بييجي من البيف سيرلوين خلف الضلوع.
عادة بيتطلع ناشفة شوية لو أخدت وقتها علي النار، ولذلك وجب الحذر أثناء التسوية.
حضراتكم كدة إتعرفتوا علي أفضل قطعيات الستيك وجاهزين للمرحلة اللي بعد كدة