top of page

٧ خطوات لأفضل استيك | كل حاجة علي الشواية

Updated: Nov 21, 2019

بعد ما سألت ناس كتير ووقفت مع ناس كتير على الشواية، اكتشفت ان الناس بتعمل الستيك بطريقة من اتنين، اما البساطة والاستسهال او التركيز بزيادة جدا. في ناس بتولع الفحم وترمي الستيك علية، تقلبه مرة وبعدين تبدأ في التقديم والأكل مباشرة، وناس تانية بتعامل الستيك معاملة حياة أو موت، يا أنا يا انت.


طبعا كل طريقة منهم لها مميزاتها لكن في الاخر، خير الأمور الوسط.


عمل الستيك سهل وبسيط وفي السطور الجايه هقولك علي ٧ خطوات للوصول لأفضل استيك ومع الممارسة، أنا متأكد إنك هتحترف وهتوصل لستيك مقرمش من برة وطري جدا من جوة زي بتاع أشهر المطاعم.




درجة حرارة الستيك قبل التسوية


ناس كتير بتاخد الستيك مباشرة من التلاجة علي الشواية، ودة بيتسبب في عدم توزيع الحرارة بشكل مظبوط داخل اللحم وبالتالي بتأثر علي جودة التسوية. ببساطة الجزء الخارجي من الستيك هيستوي بسرعه نظرا لقربه من النار وهيفضل الجزء الداخلي مش مستوي، ولو قررت الانتظار واعطائه المزيد من الوقت لتسوية الجزء الداخلي، هيتحرق الج

زء الخارجي.

في الحالتين التسوية مش هتعجبك.

لو عايز تتفادي كل دة، سيب اللحمة خارج التلاجه لمدة نص ساعة حتي تصل لدرجة حرارة الغرفة وبعدين ابدأ في التتبيل والتسوية.

بمناسبة التتبيل، الستيك مش محتاج غير الملح الخشن (خليك كريم في الملح) قبل التسوية وفلفل اسود بعد التسوية.

تتبيلة البصل اللي إحنا متعودين عليها بتقتل طعم الستيك وبتتحرق علي شبكة الشواية ودة بيخلي تنضيفها بعد كدة شبة مستحيل.




بغض النظر انت هتشوي اية، طيور او لحوم، لازم تتأكد من نظافة شبكة الشواية بشكل جيد جدا.

النظافة مش بس هتسهل عليك تقليب الاكل والتسوية، لكن كمان هتضمنلك طعم مظبوط للأكل، طعم مش متأثر بالأكل اللي شويتة الأسبوع اللي فات علي الشواية واللي بطبيعة الحال بيكون سايب بواقي علي الشبكة.

من الأفضل تنضيف الشبكة وهي لسة سخنة عن طريق فرشاة مخصوصة للشوايات زي اللي في الصورة اللي تحت. خد وقتك في النضافة واهتم بالتفاصيل عشان تحس بالفرق في سهولة التسوية وجمال الطعم.

كمان لازم تمسح الشبكة بزيت أكل، زيوت زي عباد الشمس أو زيت الدرة بتقوم بدور كويس جدا في منع التصاق اللحوم بالشبكة.





عشان توصل لدرجة القرمشة المطلوبة علي الطبقة الخارجية من الستيك مع الاحتفاظ بالليونة داخل الستيك، لازم تقسم الشواية لقسمين، قسم شديد السخونة وقسم أقل حرارة عن طريق وضع الفحم شديد الاشتعال في النصف الأيم


ن من الشواية وترك النصف الاخر خالي من الفحم.



قم بتسخين شبكة الشواية جيدا، بحيث إنك متقدرش تقرب إيدك من الشبكة لمدة تزيد عن ثانية واحدة.

بعد ما تقوم بتشويح الستيك علي القسم المشتعل لمدة دقيقتين علي كل وش والوصول لدرجة القرمشة المطلوبة، إنقل الستيك علي القسم الأقل اشتعالا في الشواية وقم بإغلاق الغطاء للتسوية من الداخل.





المس الستيك أثناء التسوية


أشهر الطهاة في العالم بيقدروا يحددوا درجة التسوية عن طريق اللمس.

دوس علي الستيك بصباعك، مع الحذر، كلما زادت صلابة اللحم زادت درجة التسوية.



متلعبش في الستيك


ايوة عادي انك تلمس الستيك لمعرفة درجة التسوية، لكن متفضلش تقلب الستبك وتخبطة بشوكة أو سكينة، كدة ممكن يخسر السوائل والطعم اللي فية.

الستيك بيتقلب مرة واحدة للتشويح ويتنقل للناحية الأقل سخونة مرة واحدة لإكمال التسوية.

لو الستيك لاصق في الشبكة، معناة إن التشويح لم يتم بعد...



طبعا لو بتعمل قطعية رفيعة، الموضوع مش مستاهل ترموميتر، لكن في حالات زي الريب آي، ستريبلوين أو التوماهوك، أكيد هتحتاج ترموميتر لمعرفة درجة الحرارة الداخلية لقطعة اللحم وتحديد التسوية اللي تحبها.

لو بتحبها قليلة التسوية، شيل اللحم من علي الشواية عند درجة حرارة ١٢٠ ل ١٢٥ ف

لو بتحبها قليلة لمتوسطة التسوية، شيل اللحم من علي الشواية عند درجة حرارة ١٢٥ ل ١٣٠ ف

لو بتحبها متوسطة التسوية، شيل اللحم من علي الشواية عند درجة حرارة ١٣٠ ل ١٣٥ ف

سيب اللحم خارج الشواية لمدة ٥ دقائق لتجميع السوائل بداخلة مرة أخري وبعدين قطع وإستمتع بأحلي طعم.







395 views0 comments
bottom of page