للأكل المشوي متعته الخاصة، كل مرحله لها جمالها. شراء اللحوم والطيور، عملية النظافة، التتبيل والتجهيز من قبلها بيوم، تنظيف الشواية، توليع الفحم ثم أخيرا التجمع مع الأهل والأصحاب ومشروبك المفضل وبدء الشواء والأكل.
مفيش شك إنه في بعض الأحيان بتقابلنا مشاكل زي ضبط التتبيله، نسبة السواء وده بيعتمد بشكل كبير على نوع اللحوم، إن كانت بقري، ضاني أو طيور، قطعية اللحوم، جودة الفحم، خبرة اللي واقف على الشواية وعوامل تانية كتير.
لكن يظل أكبر تحدي بيقابلنا كلنا هو أول خطوة في اليوم، خطوة توليع الفحم. كلنا بنجتهد و بنخترع طرقنا الخاصة عشان نتخطي المرحلة دي لكن كل مرة بنقابل مشاكل جديدة.
في ناس بتحاول تبتدي بخشب و ناس بتستعمل أنواع مختلفة من الجاز عشان نسرع العملية، لكن كل الطرق دي بتأثر بشكل سلبي علي طعم الأكل وعلي مدي صلاحيتة.
توليع الفحم يا سادة هو"فن" في حد ذاته، فن يحتاج إلى بعض من التعليم والإتقان والممارسة و بعض الأدوات البسيطة واللي بدورها بتخلي بداية يومك سهله و سعيدة.
في السطور القليلة القادمة هشرحلكم أسرع ٣ طرق وأكثرها سهوله وأمان عشان تولع الفحم بشكل مضبوط، بدون معاناة وفي أقل من ١٥ دقيقة.
١. طريقة البوتاجاز
الطريقة دي هي من أكثر الطرق استخداما وقد تكون أشهرها على الإطلاق.
الموضوع ببساطة إنك بتولع ٥ أو ٦ فحمات على البوتاجاز وترجع تحطهم في الشواية وترص الفحم عليهم بشكل رأسي وتنتظر حتى تنتقل النار من الفحم المولع للفحم الجديد.
طبعا الطريقة دي هي من أقل الطرق فعالية حيث انها بتاخد وقت طويل جدا وبتعرض بيتك للخطر. انت عمليا بتمشي جوة البيت بفحم والع يتطاير منة الشرار و بقايا فحم مولع و دة ممكن يحرقلك الستاير، أثاث البيت أو يتطور الموضوع لما هو أسوأ من ذلك لا قدر اللة.
٢. طريقة المناديل الورقية
طريقة المنديل من الطرق اللي ميعرفهاش ناس كتير، هي واحدة من الطرق اللي ممكن تتعلمها في الكشافة او الجيش.
طريقة فعالة، سريعة وسهله.
كل المطلوب منك هو إنك تكون جاهز بمناديل ورقية و قليل من زيت الأكل، زيت عباد شمس، زيت درة او زيت زيتون. حتي لو زيت مستعمل من قبل، كمان هيقوم بالمطلوب.
الخطوة الأولي: قم بوضع كل منديل في الزيت حتي يتشربة بالكامل
الخطوة الثانية: قم بتوزيع عدد من المناديل المبللة بالزيت داخل الشواية
الخطوة الثالثة: قم بتوزيع الفحم بشكل جيد فوق المناديل دون منع الهواء عن المناديل
الخطوة الرابعة: قم بإشعال طرف كل منديل و انتظر حتي يشتعل الفحم بالكامل في خلال ١٥ دقيقة
الطريقة دي سهلة جدا و مفيش منها مخاطر نظرا لأن العملية كلها بتتم علي الشواية خارج المنزل و مش مطلوب فيها غير مناديل و زيت.
٣. طريقة المدخنة
طريقة حرفية، فعالة و مريحة جدا.
الأدوات المطلوبة بسيطة:
مدخنة إشعال الفحم
مكعب اشعال سريع
كل المطلوب هو وضع الفحم داخل النصف الأعلى من المدخنة ومكعب الاشعال السريع في النصف الاسفل ووضع المدخنة داخل الشواية ثم قم بإشعال المكعب واستمتع بوقتك و مشروبك البارد لمدة ١٥ دقيقة.
في خلال ١٥ دقيقة هيكون الفحم اشتعل بالكامل و بشكل حرفي و كدة تقدر تبدأ عملية الشواء.
الشكل الأسطواني للمدخنة وتوزيع الهواء داخلها له مفعول سحري علي السرعة والفعالية
الفيديو ده في شرح تفصيلي لكل الطرق. اتفرج علية وابعتلي استفساراتك في التعليقات اسفل الفيديو.